جامعہ سندھ، جامشورو کے انسٹیٹیوٹ آف انگلش لینگویج اینڈ لٹریچر کی جانب سے خوراک کا عالمی دن منایا گیا، تقریب میں جامعہ سندھ کے وائس چانسلر پروفیسر ڈاکٹر فتح محمد مری (تمغۂ امتیاز) نے بطور مہمانِ خصوصی شرکت کی۔ اس موقع پر انہوں نے انسٹیٹیوٹ کے مختلف شعبوں کے طلبہ کی جانب سے لگائے گئے مختلف کھانوں اور مشروبات کے اسٹالز کے علاوہ خوراک اور ماحولیات کے موضوع پر تیار کردہ پروجیکٹس کا جائزہ لیا، طلبہ سے ان کے بارے میں بریفنگ لی اور ان کی محنت کو سراہا۔ وائس چانسلر نے اس موقع پر ایک پودا بھی لگایا اور انسٹیٹیوٹ کے طلبہ کی جانب سے درختوں کی خوبصورتی اور اہمیت کو اجاگر کرنے کے مقصد سے مختلف رنگوں اور اسٹیکرز سے سجائے گئے پودوں کا معائنہ  کیا۔ انہوں نے طلبہ کی پودوں سے محبت کے جذبے کی تعریف کی۔

اس موقع پر اپنے خیالات کا اظہار کرتے ہوئے وائس چانسلر ڈاکٹر مری نے کہا کہ خوراک انسانوں سمیت ہر جاندار کی بنیادی ضروریات میں شامل ہے۔ صحت بخش اور متوازن خوراک انسانی صحت، نشوونما اور معاشرتی ترقی کے حوالے سے انتہائی اہمیت رکھتی ہے۔ انہوں نے کہا کہ دنیا بھر میں بے شمار افراد غذائی قلت کا سامنا کر رہے ہیں۔ خوراک کا عالمی دن منانے کا مقصد صحت بخش خوراک کی اہمیت کو اجاگر کرنا، غذائی قلت کی نشاندہی کرنا، اس مسئلے کا مل کر حل تلاش کرنا اور ہر فرد کے لیے خوراک تک رسائی یقینی بنانا ہے۔

وائس چانسلر نے کہا کہ پاکستان ایک زرعی ملک ہے، جہاں بڑی مقدار میں مختلف اقسام کے اناج اور سبزیاں پیدا ہوتی ہیں۔ زرعی پیداوار میں اضافے اور اناج کی قلت کے خاتمے کو یقینی بنانے کے لیے جدید زرعی ٹیکنالوجی، سائنسی تحقیق، پانی کے مؤثر استعمال اور پائیدار زرعی طریقوں کو فروغ دینا وقت کی اہم ضرورت ہے۔ انہوں نے کہا کہ موسمیاتی تبدیلی آج کا ایک بڑا چیلنج ہے، جس سے نمٹنے کے لیے کثیرالجہتی اقدامات کے ساتھ ساتھ زیادہ سے زیادہ آگاہی پھیلانے کی ضرورت ہے۔ اس حوالے سے جامعات کا کردار انتہائی اہم ہے، جہاں اس نوعیت کے پروگراموں کے ذریعے ان مسائل کو اجاگر کیا جا سکتا ہے۔

وائس چانسلر نے کہا کہ انسٹیٹیوٹ کے طلبہ کی جانب سے خوراک اور ماحولیات کے حوالے سے لگائے گئے اسٹالز اور تیار کردہ منصوبے دیکھ کر انہیں بے حد خوشی ہوئی ہے۔ چنے، فروٹ چاٹ اور لیموں پانی کے اسٹالز صحت بخش خوراک کا پیغام دے رہے تھے، جبکہ پودوں کو خوبصورتی سے سجا کر زیادہ سے زیادہ پودے لگانے اور ان کی بہتر دیکھ بھال کرنے کا پیغام بھی دیا گیا۔

انہوں نے کہا کہ طلبہ کو اس نوعیت کی سرگرمیوں میں زیادہ سے زیادہ شرکت کے مواقع فراہم کرنے کی ضرورت ہے، تاکہ ان میں خوداعتمادی بڑھنے کے ساتھ ساتھ ان کی مہارتوں میں بھی اضافہ ہو سکے۔

اس موقع پر انسٹیٹیوٹ کے ڈائریکٹر ڈاکٹر طارق عمرانی نے وائس چانسلر کا خیرمقدم کیا اور ان کی آمد پر شکریہ ادا کیا۔ پروگرام کی نگران انسٹیٹیوٹ کی ایسوسی ایٹ پروفیسر ڈاکٹر ثمینہ عباسی تھیں، جبکہ طلبہ کی آرگنائزنگ ٹیم میں مجتبیٰ حسین بھٹی، محمد عادل ڈاہری، مطلوب احمد میمن اور دیگر شامل تھے۔ پروگرام میں انسٹیٹیوٹ کے اساتذہ اور طلبہ نے بڑی تعداد میں شرکت کی۔