سنڌ يونيورسٽي ڄامشورو جي فئڪلٽي آف نيچرل سائنسز جي ڊين پروفيسر ڊاڪٽر وزير علي بلوچ موسمي برساتن دوران يونيورسٽيءَ ۾ ٽعليمي سرگرميون معطل هئڻ سبب ملتوي ڪيل ايم فل ۽ پي ايڇ ڊي سيمينارن جو شيڊول جاري ڪري ڇڏيو آهي. پنهنجي جاري ڪيل پڌرائيءَ ۾ ڊين پروفيسر ڊاڪٽر وزير علي بلوچ ڄاڻايو ته نيچرل سائنسز فئڪلٽيءَ جي مختلف شعبن جي ايم فل ۽ پي ايڇ ڊي (پوسٽ گريجوئيٽ ريسرچ) جا سيمينار 26 سيپٽمبر 2022ع کان شروع ٿيندا، جيڪي 12 آڪٽوبر 2022ع تائين جاري رهندا. هن وڌيڪ ڄاڻايو ته سمورا سيمينار ڊين آفيس جي وڊيو ڪانفرنس روم ۾ منعقد ڪيا ويندا. نيچرل سائنسز جي ڊين موجب مختلف شعبن جا مجموعي طور 68 اسڪالر ايم فل پهريون/ فائنل ۽ پي ايڇ ڊي پهريون/ ٻيو/ فائنل جي سيمينارن ۾ پنهنجي تحقيقي تجويزن ۽ ٿيسز جو دفاع ڪندا.