سنڌ ايجوڪيشنل اينڊومينٽ فنڊ اسڪالرشپ لاءِ سنڌ يونيورسٽي ۾ تعليمي سيشن 2023-24 جا انٽرويوز جاري آهن، جتي 300 کان وڌيڪ سيٽن لاءِ ھڪ ھزار کان وڌيڪ شاگرد مالي سهائتا حاصل ڪرڻ لاءِ درخواستون ڏئي چڪا آهن. اسڪالرشپ جي چونڊ جو عمل اينڊومينٽ فنڊ ڪميٽي جي نگراني هيٺ سکر آءِ بي اي يونيورسٽي جي عملدارن جي سهڪار سان مڪمل ڪيو پيو وڃي.  ھلندڙ سال 300 کان وڌيڪ اسڪالرشپس ڏنيون پيون وڃن، جيڪي خاص طور انڊر گريجوئيٽ شاگردن لاءِ آهن. هي مالي سهائتا صرف ٽيوشن فيس تي مشتمل آهي، جنهن جو مقصد ذهين پر مالي طور تي لاچار شاگردن جي اعليٰ تعليم جي حوصلا افزائي ڪرڻ آهي. سنڌ ايجوڪيشنل اينڊومينٽ فنڊ جيڪو سنڌ حڪومت جو هڪ اهم تعليمي قدم آهي، مسلسل معياري تعليم جي فراهمي کي يقيني بڻائڻ ۽ مستحق شاگردن تي مالي بوجهه گهٽائڻ ۾ اهم ڪردار ادا ڪري رهيو آهي.