سنڌ يونيورسٽي ڄامشورو جي اختيارين اعلان ڪيو آهي ته پهرئين سيمسٽر جا امتحان امڪاني طور مئي 2026ع جي پهرئين هفتي ۾ منعقد ڪيا ويندا. ان سلسلي ۾ شاگردن لاءِ ھڪ ھدايت نامو پڻ جاري ڪيو ويو. جنھن ۾ کين صلاح ڏني ويئي آھي ته پهرئين سيمسٽر جي امتحانن دوران سازگار تعليمي ماحول برقرار رکيو وڃي. اسٽوڊنٽ افيئرز جي ايڊوائيزر پاران جاري ڪيل ھڪ پڌرائيءَ ۾ شاگردن کي صلاح ڏني ويئي آهي ته هو پنهنجو وقت مؤثر نموني استعمال ڪن ۽ بهترين تعليمي ڪاميابي حاصل ڪرڻ لاءِ پنهنجي تياريءَ تي مڪمل ڌيان ڏين. يونيورسٽي انتظاميا شاگردن تي اھو زور پڻ ڀريو آهي ته هو ڪيمپس اندر نظم ضبط، صبر ۽ هم آهنگي کي برقرار رکن ۽ اهڙين سرگرمين کان پاسو ڪن، جيڪي تعليمي ماحول کي متاثر ڪرڻ جو سبب بڻجن. شاگردن کي چيو ويو آهي ته هو تدريسي ۽ معاون عملي سان مڪمل سهڪار ڪن.