سنڌ يونيورسٽي ڄامشورو جي ڊائريڪٽر ايڊميشنز پروفيسر ڊاڪٽر اياز ڪيريو پنهنجي ھڪ پڌرائيءَ ۾ ڄاڻايو آهي ته سنڌ يونيورسٽي جي بيچلرس ڊگري پروگرامن جي ٻئين، ٽئين، چوٿين، پنجين ۽ ماسٽر (فائنل) مارننگ ۽ ايوننگ ڪلاسن جي تعليمي سال 2024ع ۾ داخلائن لاءِ في جمع ڪرائڻ جي تاريخ ۾ 19 اپريل 2024ع تائين واڌ ڪئي ويئي آهي. پڌرائيءَ ۾ شاگردن کي صلاح ڏني ويئي ته ھو فيس جمع ڪرڻ کانپوءِ اڳئين ڪلاسن ۾ داخلائن وارو فارم ڀري گھربل ڪاغذن سان گڏ پنھنجي شعبن جي سربراهن جي آفيسن ۾ جمع ڪرائين. پڌرائيءَ موجب شاگرد پنهنجي داخلا في ون بل، ون لنڪ، ايڇ بي ايل موبائيل ايپ، ايڇ بي ايل ڪونيڪٽ ايپ، ايزي پئسا، جيز ڪيش يا ڪنهن به بئنڪ جي موبائيل ايپ ذريعي جمع ڪرائي سگهن ٿا. پڌرائيءَ موجب جيڪي به شاگرد 19 اپريل تائين اڳين ڪلاسن ۾ داخلا فيس جمع ڪرائي پنهنجن شعبن جي سربراهن وٽ داخلا فارم جمع نه ڪرائيندا ته اهو سمجهيو ويندو ته اهي وڌيڪ پڙهڻ ۾ دلچسپي نٿا رکن، تنهنڪري سندن اِي پورٽل اڪائونٽ بند ڪرڻ جو چتاءُ ڏنو ويو آهي.