سنڌ يونيورسٽيءَ جي ايلسا قاضي ڪئمپس حيدرآباد ۾ گذريل ڏينهن سنڌي ثقافت جو ڏهاڙو وڏي جوش ۽ جذبي سان ملهايو ويو. تقريب ۾ سنڌ جي قديم ورثي ۽ روايتن کي ڀيٽا پيش ڪئي ويئي، جنهن ۾ ايم پي اي صابر حسين قائمخاني مهمان خاص ۽ ڊاڪٽر عابد حسين ساند اعزازي مهمان طور شرڪت ڪئي. تقريب سنڌ يونيورسٽيءَ جي وائيس چانسيلر پروفيسر (ايمريٽس) ڊاڪٽر محمد صديق ڪلهوڙو جي سرپرستيءَ ۾ منعقد ڪئي ويئي. تقريب کي خطاب ڪندي خاص مهمان شاگردن جي شاندار محنت جي واکاڻ ڪئي ۽ تقريب جي انتظامن تي سندن جذبي کي ساراهيو. هن ثقافتي شعور کي معاشري ۾ اتحاد ۽ هم آهنگي پيدا ڪرڻ لاءِ اهم قرار ڏنو ۽ تعليم کي ثقافتي ورثي جي حفاظت ۽ ان کي اجاگر ڪرڻ ۾ هڪ اهم ڪردار قرار ڏنو. تقريب ۾ ڪيترائي دلچسپ پروگرام شامل هئا، جن ۾ روايتي موسيقي، سنڌي لوڪ گيت، علائقائي کاڌن جا اسٽال ۽ سنڌي لباس جا ڏيکاءُ شامل هئا. شاگردن جي جوش ۽ جذبي کي ساراهيو ويو ۽ کين سندن شاندار ڪارڪردگيءَ تي سرٽيفڪيٽ ڏنا ويا. تقريب جي ڪاميابيءَ جو ڪريڊٽ ايجوڪيشن فئڪلٽيءَ جي ڊين پروفيسر ڊاڪٽر عبد الستار عالماڻي ۽ ثقافتي ڏينهن ڪميٽي جي ڪنوينر ڊاڪٽر عبدالستار گوپانگ ۽ سندن ٽيم جي محنت کي ڏنو ويو. ڄاڻايل تقريب ذريعي نه رڳو سنڌ جي ثقافتي روايتن کي اجاگر ڪيو ويو پر سنڌ يونيورسٽيءَ جي گڏيل ثقافتن جي فروغ لاءِ پڻ هڪ مثال قائم ڪيو ويو.