سنڌ يونيورسٽي ڄامشورو پنهنجي ماحول دوست “سرسبز ڪيمپس” رٿا تحت موسمي وڻڪاري مهم شروع ڪري ڇڏي آھي، جنھن ۾ وائيس چانسلر پروفيسر ڊاڪٽر خليل الرحمان کمڀاٽي پاڻ املتاس ۽ گُل مهر جا ٻوٽا لڳائي وڻڪاري مهم جو باضابطا افتتاح ڪيو. وائيس چانسلر ڊاڪٽر کمڀاٽيءَ ٻڌايو ته هيءَ وڻڪاري مهم يونيورسٽيءَ پاران ڪئمپس جي حياتياتي تنوع کي وڌائڻ ۽ موسمي تبديليءَ خلاف شعور اجاگر ڪرڻ لاءِ شروع ڪيل قدمن جو هڪ تسلسل آهي. ھن چيو ته گذريل وڻڪاري مهم دوران او جي ڊي سي ايل سان گڏجي يونيورسٽيءَ اندر ڏهه ھزار ٻوٽن تي مشتمل هڪ “مياواڪي جنگل” قائم ڪيو ويو، جنهن ۾ گهٽ ۾ گهٽ ڇھه فوٽ اهڙا ڇانوَ ڏيندڙ وڻ شامل هئا ۽ انهن جي واڌ ويجھه جي شرح 90 سيڪڙو کان وڌيڪ ٿي. ھن چيو ته مياواڪي جنگل يونيورسٽيءَ جي خوبصورتيءَ ۾ اضافو ڪندو ۽ ماحول کي بھتر بڻائيندو. ھن چيو ته ھلندڙ سال جي مهم تحت طئه ڪيو ويو آهي ته جولاءِ ۽ آگسٽ 2025ع مهينن دوران ڪئمپس ۾ 50000 مختلف نسلن جا وڻ پوکيا ويندا ته جيئن هڪ پائيدار ۽ سرسبز ماحول قائم ڪيو وڃي. ھن چيو ته وڻڪاري مهم سنڌ يونيورسٽيءَ جي ڊگھي مدت واري رٿا جو حصو آهي، جنهن جو مقصد استادن، شاگردن ۽ سماج سان گڏجي ماحولياتي شعور وڌائڻ ۽ ڪئمپس کي هڪ متحرڪ، سرسبز ۽ ماحول دوست جاءِ بڻائڻ آهي.