سنڌ يونيورسٽي ڄامشورو جي انسٽيٽيوٽ آف انگلش لينگويج اينڊ لٽريچر جي اسسٽنٽ پروفيسر ۽ ڊائريڪٽر ڪئمپس سيڪيورٽي ڊاڪٽر ثاقب ٻرڙو پاران مادرعلمي کي ڇڏي يونيورسٽي آف ميرپورخاص ۾ پروفيسر طور جوائن ڪرڻ کانپوءِ سندس مان ۾ سنڌ جاڳرتا فورم پاران پر وقار الوداعي تقريب منعقد ڪئي وئي، جنھن ۾ مختلف شعبن جي استادن، آفيسرن ۽ ملازمن وڏي انگ ۾ شرڪت ڪري محفل جي مور کي سوين اجرڪون اوڍايون، کيس گلدستا ارپيا ۽ ٻيون سوکـڙيون پيش ڪيون. تفصيل موجب سنڌ يونيورسٽي جي انسٽيٽيوٽ آف انگلش لينگويج اينڊ لٽريچر جي اسسٽنٽ پروفيسر ڊاڪٽر غلام ثاقب ٻرڙو کي يونيورسٽي آف ميرپور خاص ۾ پروفيسر مقرر ٿيڻ تي وڏي شان شوڪت سان الوداع ڪيو ويو، سنڌ يونيورسٽي جي ايريا اسٽڊي سينٽر جي آڊيٽوريم ۾ هڪ پر وقار تقريب جاڳرتا فورم ڄامشورو پاران منعقد ڪئي وئي، جنهن جي صدارت ڊين فيڪلٽي آف آرٽس پروفیسر ڊاڪٽر محمد خان سانگي ڪئي، جڏهن ته پرو وائيس چانسلر دادو ڪئمپس ڊاڪٽر اظهر علي شاھ،  رجسٽرار ڊاڪٽر مشتاق علي ڄاريڪو، ڊاڪٽر شاھ مراد چانڊيو، ڊاڪٽر حاڪم علي مهيسر، ڊاڪٽر جليل مهيسر، ڊائريڪٽر اسٽوڊنٽ افيئرس ڊاڪٽر يونس لغاري، پرووسٽ سنڌ يونيورسٽي ڊاڪٽر پسند کوسو، يونيورسٽي ترجمان نادر علي مغيري، الله ورايو سھتو، محمد علي گھانگھرو، ذوالفقار علي رستماڻي، غلام رسول چانڊيو ۽ ٻين استادن، آفيسرن ۽ ملازمن وڏي انگ ۾ شرڪت ڪئي، پروگرام جو آغاز لطيف سائين جي وائي سان ڪيو ويو ۽ محمد علي گهانگهرو ڪارروائي هلائي . ڊاڪٽر سانگي خطاب ڪندي چيو ته ڊاڪٽر ثاقب ٻرڙو سنڌ يونيورسٽي ۾ شاندار تعليمي، تحقيقي ۽ انتظامي خدمتون سرانجام ڏنيون، سندس خدمتن کي هميشه ياد رکيو ويندو. پرووائيس چانسلر ڊاڪٽر اظهر علي شاھ چيو ته ڊاڪٽر ٻرڙو گهڻ طرفي شخصيت آهي ۽ بي پناھ صلاحيتن جو مالڪ آهي اميد ته ميرپورخاص يونيورسٽي ۾ به غير معمولي خدمتون سرانجام ڏيندو. ڊاڪٽر شاھ مراد چانڊيو چيو ته ثاقب ٻرڙو غير معمولي صلاحيتن جو مالڪ آهي، سندس تحقيق ۽ تدريس جو معيار عالمي سطح جو آهي. ڊاڪٽر مشتاق ڄاريڪو چيو ته تحقيقي ۽ تدريسي ڪردار ۾ ته ڊاڪٽر ثاقب مٿاهين درجي تي بيٺل آهي پر سندس انتظامي صلاحيتون به غير معمولي آهن. هن ڊائريڪٽر ڪئمپس سيڪيورٽي جي حيثيت سان سنڌ يونيورسٽي ۾ ڊجيٽل نظام لاڳو ڪري سنڌ يونيورسٽي کي محفوظ بڻائي ڇڏيو آهي. ناليواري ليکڪ ۽ شاھ لطيف جي پارکو غلام رسول چانڊيو چيو ته ادارا ديوارن نه پر فردن جو نالو آهن، ثاقب ٻرڙو انسان دوست، بهترين منتظم ۽ وڏو تعليمي ماهر آهي جيڪو ناممڪن کي ممڪن بڻائڻ وارو آهي. پروگرام کي خطاب ڪندي انسٽيٽيوٽ آف انگلش لئنگويج ۽ لٽريچر جي ڊائريڪٽر ڊاڪٽر عبدالفتاح سومرو چيو ته ڊاڪٽر ثاقب بي مثال صلاحيتن جو مالڪ آهي، سندس پڙهائڻ ۽ تحقيق جو انداز تخليقي ۽ عالمي معيار جو آهي. ڊاڪٽر ٻرڙو منهنجي انسٽيٽيوٽ جو استاد هيو ۽ شاگردن سان وڏي شفقت سان پيش ايندو هو. ڊاڪٽر محمد يونس لغاري چيو ته ڊائريڪٽر سيڪيورٽي هئڻ دوران ڊاڪٽر ثاقب شاگردن کي زبردست طريقي سان ڊيل ڪيو ۽ کين هر معاملي ۾ پيار سان سمجهائيندو رهيو. منظور علي پنهور چيو ته ڊاڪٽر ثاقب جي وڃڻ سان خوشي ۽ ڏک جي ڪيفيت آهي. خوشي ان ڪري جو کيس 21 گريڊ ڏئي ميرپور خاص يونيورسٽي ۾ مقرر ڪيو ويو آهي ۽ ڏک جي ڪيفيت ان ڪري جو سنڌ يونيورسٽي هڪ معتبر تعليمي ماهر کان محروم ٿي رهي آهي. سنڌ يونيورسٽي سينڊيڪيٽ جي ميمبر محمد عقيل ڀٽو چيو ته ثاقب ۾ ڪمال جون صلاحيتون آهن، اميد آهي ته ميرپورخاص يونيورسٽي لاءِ اهم ڪردار ادا ڪندو. ان موقعي تي محفل جي مور پروفيسر ڊاڪٽر غلام ثاقب ٻرڙو خطاب ڪندي چيو ته سنڌ يونيورسٽي ۾ اڄ جيڪو مان ۽ عزت ملي آهي، ان کي ڪڏهن به وساري نه سگهندس. هن چيو ته سماج جي ترقي جو بنياد تعليمي ادارا آهن، اسان کي گهرجي ته تحقيق ۽ تدريس جي کيتر ۾ غير معمولي ڪردار ادا ڪريون ۽ پنهنجو پاڻ کي سماج ڏانهن جوابدار سمجهون ته هي سماج ترقي جي بلندين کي ڇهندو ۽ اڄوڪين حالتن ۾ اسان جو ڪردار وڌيڪ توجھ گهري ٿو. هن چيو ته زندگي تحرڪ جو نالو آهي ۽ اسان کي گهرجي ته پنهنجي صلاحيتن کي ڀرپور طريقي سان استعمال ڪري ڀرندڙ سماج کي بچايون ۽ ترقي وٺرايون. ان موقعي تي سيوا اڳواڻ ذوالفقار رستماڻي، احمد علي ڪنڀار ۽ ٻين پڻ خطاب ڪيو، جڏهن ته جاڳرتا فورم جي اڳواڻ محمد علي گهانگهرو پروگرام جي بهترين ڪارروائي هلائي ۽ ھو شاعري وسيلي سامعين کي موهيندو رهيو. ڄاڻايل تقريب کان اڳ ڪئمپس سيڪيورٽي آفيس ۾ پڻ ٻه پر وقار تقريبون ٿيون، جنهن ۾ سيڪيورٽي گارڊن، سپروائزرن ۽ آفيسرن وڏي انگ ۾ شريڪ ڪري ڊاڪٽر ثاقب ٻرڙو تي گلن جي ورکا ڪئي ۽ کيس اجرڪون پارايون جڏهن ته ممتاز انڙ پاران پڻ ثاقب ٻرڙو لاءَ الوداعي پروگرام منعقد ڪري کيس لنگين ۽ اجرڪن جا تحفا پيش ڪيا ويا، هر پروگرام ۾ ڪيترائي جذباتي منظر پڻ ڏسڻ ۾ آيا