سنڌ يونيورسٽي ڄامشورو ۾ 14 آگسٽ جي سلسلي ۾ معرڪه حق جي سري هيٺ ٻن هفتن واري جشن جو پنجون ڏينهن وڏي جوش ۽ جذبي سان ملهايو ويو، جنهن جي مک تقريب سيد پناهه علي شاهه ماڊل اسڪول ۾ منعقد ٿي، جنهن ۾ پاڪستان جي قيام جا مقصد اجاگر ڪيو ويو. تقريب ۾ شاگردياڻين ۽ ليڊي ٽيپچرن وڏي قومي جوش سان شرڪت ڪئي، سندن هٿن ۾ قومي جهنڊا کنيل هئا، جن معرڪه حق واري سري هيٺ سرگرمين ۾ ڀرپور حصو ورتو. اسڪول جي مين هال ۾ ٻارن پاران قومي گيت ڳايا ويا ۽ قومي نغمن تي رقص پيش ڪري ملڪ سان محبت جو اظهار ڪيو ويو. شاگردياڻين آزادي جي مجاهدن ۽ قومي هيروز کي ڀيٽا پيش ڪرڻ لاءِ تقريرون ۽ پرفارمنسز پيش ڪيون. هنن پاڪستان جي حفاظت لاءِ پنهنجيون جانيون قربان ڪندڙ فوجي جوانن، رينجرز ۽ پوليس اهلڪارن جي قربانين کي به ڀيٽا پيش ڪئي. تقريب کي وڌيڪ رنگا رنگ بڻائيندي اسڪولي شاگردياڻين قومي جهنڊي جي رنگن وارا لباس پائي شرڪت ڪئي. ڪجهه شاگردياڻين قومي شاعر ڊاڪٽر علامه محمد اقبال سميت ٻين شاعرن جي نظمن کي پڙهي حب الوطني ۽ تفريح جو حسين امتزاج پيش ڪيو. اسڪول کي خوبصورت رنگ برنگي غبارن ۽ جهنڊين سان سينگاريو ويو، جن مهمانن لاءِ وڻندڙ منظر پيش ڪيو. ان موقعي تي تقريب جي صدارت ڪندڙ سنڌ يونيورسٽي جي وائيس چانسلر پروفيسر ڊاڪٽر خليل الرحمان کمڀاٽيءَ چيو ته پاڪستان هڪ عظيم ملڪ آهي. اسان جي باني قائداعظم محمد علي جناح ۽ اسان جي بزرگن هڪ ڌار وطن لاءِ بي مثال قربانيون ڏنيون. سنڌ جي ماڻهن به پاڪستان جي قيام لاءِ اهم ڪردار ادا ڪيو. هن شاگردن جي ذهني واڌ ويجهه لاءِ نصابي ۽ غير نصابي سرگرمين جي اهميت تي زور ڏنو. وائيس چانسلر چيو ته اسان جي ڪوشش آهي ته روايتي ڪلاس روم کان نڪري شاگردياڻين کي نوان، اهم ۽ دلچسپ تجربا ڏجن. اهڙين تقريبن ذريعي اسان شاگردن جي مختلف مهارتن جي ترقي لاءِ ڪيل ڪوششن کي اجاگر ڪرڻ چاهيون ٿا ته جيئن مقامي برادري به ان عمل ۾ شامل ٿي سگهي. تقريب ۾ والدين وڏي انگ ۾ شرڪت ڪئي، جن شاگردياڻين، فئڪلٽي ۽ اسڪول انتظاميا جي گڏيل ڪوششن جو مشاهدو ڪيو ۽ انهن کي ڀرپور ساراهيو.