ملڪ جي 78هين آزادي جي ڏهاڙي جي حوالي سان بنيان المرصوص ۽ معرڪهءِ حق تحت ٻن هفتن تي ٻڌل جشن ملهائڻ جو سلسلو جاري آهي. سنڌ يونيورسٽي ۾ مختلف تعليمي شعبن پاران ست الڳ الڳ شاندار تقريبون منعقد ڪيون ويون، جن ۾ استادن، شاگردن ۽ انتظامي عملي ڀرپور شوق ۽ جذبي سان شرڪت ڪئي. گذريل ڏينهن جي پهرين تقريب ڊاڪٽر ايم اي قاضي انسٽيٽيوٽ آف ڪيمسٽري ۾ ٿي، جتي وائيس چانسلر پروفيسر ڊاڪٽر خليـل الرحمان کُمڀاٽي پهريون ٻوٽو لڳائي وڻڪاري مهم جو باضابطه افتتاح ڪيو. انسٽيٽيوٽ جي ڊائريڪٽر ڊاڪٽر عرفانه بيگم ملاح، استادن، محققن ۽ انتظامي آفيسرن سان گڏ انسٽيٽيوٽ جي سامهون ٻوٽا لڳايا، جنهن سان يونيورسٽي جي ماحولياتي استحڪام لاءِ عزم کي ظاهر ڪيو ويو. وائيس چانسلر خطاب ڪندي چيو ته وڻڪاري “مستقبل جي سيڙپڪاري” آهي. هن شاگردن تي زور ڀريو ته هو ڪيمپس کي سائو رکڻ جي ذميواري پاڻ سنڀالين. ان کان پوءِ جشن انسٽيٽيوٽ آف بزنس ايڊمنسٽريشن (آءِ بي اي) ۾ جاري رهيو، جتي استادن ۽ شاگردن پاڪستان جي معاشي سفر ۽ ڪاروباري صلاحيت کي اجاگر ڪندڙ تقريرون ۽ قومي سرگرميون پيش ڪيون. ڊائريڪٽر آءِ بي اي پروفيسر ڊاڪٽر امام الدين کوسو مهمانن کي ڀليڪار ڪندي چيو ته شهرين، خاص طور استادن جي ذميواري آهي ته هو شاگردن جي ڪردار جي تعمير ۾ پنهنجو فعال ڪردار ادا ڪن. هن چيو ته استاد جو ڪردار صرف ليڪچر ڏيڻ تائين محدود ناهي، اسان کي رهنمائي، متاثر ڪرڻ ۽ اهڙا قدر اختيار ڪرڻ گهرجن جيڪي ذميوار شهرين کي جنم ڏين. ڊاڪٽر اين اي بلوچ ماڊل اسڪول حيدرآباد جي شاگردن جو هڪ گروپ پڻ جشن ۾ شامل ٿيو، جن آءِ بي اي جي آڊيٽوريم ۾ قومي نغمي “شڪريه پاڪستان” تي شاندار پرفارمنس ڏني. ان  موقعي تي  مڌر رقص ۽ جذبي سان ڀرپور ڪارڪردگيءَ حاضرين کي موهت ڪري ڇڏيو ۽ کين تاليون وڄائڻ تي مجبور ڪيو. وائيس چانسلر شاگردن جي تعريف ڪندي کين “روشن ۽ متحد پاڪستان جا سفير” قرار ڏنو. تقريب ۾ شاگردن پاران معاشي مضبوطي، جدت ۽ گڏيل ذميواري تحت تقريرون پڻ ڪيون ويون. پي وي سي مين ڪيمپس پروفيسر ڊاڪٽر عبدالستار شاهه، رجسٽرار پروفيسر ڊاڪٽر مشتاق علي ڄاريڪو، ڊائريڪٽر بيورو آف اسٽئگس ڊاڪٽر صنوبر سلمان شيخ، پروفيسر ڊاڪٽر انتظار علي لاشاري، پروفيسر ڊاڪٽر نظام الدين چنا، ڊاڪٽر عائشه سيد، ڊاڪٽر فرحان زيب خاصخيلي، ڊاڪٽر عبدالسميع شيخ ۽ ٻيا ڪيترائي پڻ موجود هئا. فئڪلٽي آف انجنيئرنگ اينڊ ٽيڪنالاجي پنهنجي جشن جو حصو وڻڪاري مهم منعقد ڪئي، جيڪا فئڪلٽي جي احاطي ۾ ٿي. استادن ۽ شاگردن جي سرگرم شرڪت سان ماحولياتي شعور ۽ پائيدار عملي کي هٿي ملي. وائيس چانسلر ايف اِي ٽي جي ٽيم جي ساراهه ڪندي چيو ته “قومي جشن کي مستقبل ڏانهن رخ ڪندڙ ٽيڪنالاجي سوچ ۽ ماحولياتي سنڀال سان ڳنڍڻ بهترين قدم آهي.” پاڪستان اسٽڊي سينٽر ۾ هڪ جاندار پروگرام ٿيو، جتي محققن ۽ شاگردن پاڪستان جي تاريخ، نظريي ۽ سماجي-سياسي چئلينجن تي ڳالهيون ڪيون. خاص ڊاڪيومينٽري پڻ ڏيکاري وئي، جنهن ۾ پاڪستان ۽ پاڙي ملڪ جي وچ ۾ ٿيل تازي جنگ کي ڏيکاريو ويو، جنهن ۾ پاڪستان جي فوج جي بهادري، حوصلي ۽ حڪمت عملي جي ڪاميابي کي نمايان ڪيو ويو. ڊاڪيومينٽري حاضر ين ۾ فخر ۽ اتحاد جو جذبو پيدا ڪيو. ڊاڪٽر کُمڀاٽي چيو ته اهڙيون پيشڪشون “اسان جي گڏيل قربانين ۽ اتحاد ۽ ضبط ذريعي پنهنجي خودمختياري جي حفاظت جي ضرورت کي ياد ڏيارين ٿيون.” ڊين فئڪلٽي آف سوشل سائنسز پروفيسر ڊاڪٽر نانڪ رام، ڊائريڪٽر ايريا اسٽڊي سينٽر ڊاڪٽر مڪيش ڪمار کٽواڻي ۽ ٻيا ڪيترائي پڻ موجود هئا. ڊپارٽمينٽ آف هسٽري پڻ وڻڪاري مهم جو انعقاد ڪيو ته جيئن قدرتي ۽ تاريخي ورثي جي حفاظت تي زور ڏنو وڃي. بعد ۾ نيلسن منڊيلا هال ۾ پاڪستان جي تاريخ تي هڪ اثرائتي ڊاڪيومينٽري ڏيکاري وئي، جنهن ۾ ملڪ جي آزادي کان موجوده ڏينهن تائين جو سفر ناياب آرڪائيوي فوٽيج ۽ تاريخي تصويرن سان پيش ڪيو ويو. اسڪريننگ حاضرين کي ملڪ جي قربانين ۽ ڪاميابين بابت ڳوڙهن ۽ فخر سان ڀرپور ڇڏيو. ان موقعي تي ڊپارٽمينٽ آف هسٽري جو چيئرمين پروفيسر ڊاڪٽر عرفان شيخ، ڊاڪٽر فيصل حيدر شاهه ۽ ٻيا  ڪيترائي استاد پڻ موجود هئا.انسٽيٽيوٽ آف انگلش لينگويج اينڊ لٽريچر جو جشن تقريرن، شاعري پڙهڻ ۽ ادبي پيشڪشن تحت شروع ٿيو، جنهن ۾ اتحاد، تنوع ۽ قومي سڃاڻپ جا موضوع نمايان هئا. ڊين فئڪلٽي آف آرٽس پروفيسر ڊاڪٽر محمد خان سانگي، ڊائريڪٽر آءِ اِي ايل ايل پروفيسر ڊاڪٽر عبد الفتاح سومرو، ڊائريڪٽر انسٽيٽيوٽ آف آرٽ اينڊ ڊزائن پروفيسر سعيد احمد منگي ۽ ٻين ڪيترن ئي استادن ۽ شاگردن ڏينهن جي حوالي سان خطاب ڪيو. هنن فن، ادب ۽ ٻوليءَ جي ڪردار تي روشني وڌي ته اهي قومي گڏجاڻي ۽ ثقافتي فخر کي ڪيئن هٿي ڏين ٿا. وائيس چانسلر پنهنجي ڳالهه ۾ استادن جي واکاڻ ڪئي ته “نه رڳو علمي شانداري پر ملڪ جي ورثي سان گهري جذباتي وابستگي پيدا ڪري رهيا آهن.” ڏينهن جي آخري تقريب ڊپارٽمينٽ آف سوشالاجي ۾ ٿي، جتي استادن ۽ شاگردن سماجي گڏجاڻي، ڪميونٽي سان لاڳاپا ۽ خوشحال پاڪستان جي تعمير ۾ نوجوانن جي ڪردار تي بحث ڪيو. ذڪر لائق ڳالهه اها آهي ته وائيس چانسلر پروفيسر ڊاڪٽر خليـل الرحمان کُمڀاٽيءَ ڀرپور قومي جوش توڙي جذبي سان ڏينهن جي سمورن تقريبن جي ذاتي طور صدارت ڪندي تاريخ رقم ڪري ڇڏي. هن هر پروگرام کي وقت سر شروع ۽ ختم ڪرائڻ کي يقيني بڻايو، جيڪو سڀني اسٽيڪ هولڊرز لاءِ وڏي خوشي جو باعث بڻيو. وائيس چانسلر سمورين سرگرمين ۾ فعال شرڪت ڪندي شاگردن ۽ استادن سان گرمجوشي سان ملندو رهيو. پرو وائيس چانسلر مين ڪيمپس پروفيسر ڊاڪٽر عبدالستار شاهه پڻ سڄو ڏينهن وائيس چانسلر سان گڏ رهيو، جنهن يونيورسٽي جي قيادت جي عزم کي ظاهر ڪيو ته اها جشن کي شاندار ڪاميابي ڏيارڻ لاءِ پرعزم آهي. جشن جي سلسلي ۾ مختلف فئڪلٽين ۽ سينٽرن ۾ سڀاڻي به وڌيڪ اهم تقريبون منعقد ٿينديون.