وزيراعليٰ سنڌ جي پبلڪ هيلٿ انجنيئرنگ ۽ رورل ڊيولپمينٽ بابت خصوصي معاون محمد سليم بلوچ گذريل ڏينهن سنڌ يونيورسٽيءَ جو دورو ڪيو ۽ يونيورسٽيءَ لاءِ 4.87 ارب روپين جي ماليت جي هڪ جامع واٽر سپلاءِ ۽ فلٽريشن پراجيڪٽ جو اعلان ڪيو، جنهن جو مقصد اداري جي وڌندڙ آباديءَ کي محفوظ پيئڻ جي پاڻيءَ جي فراهمي کي يقيني بڻائڻ آهي. سنڌ يونيورسٽيءَ جي وائيس چانسلر پروفيسر ڊاڪٽر فتح محمد مري، لياقت يونيورسٽي آف ميڊيڪل اينڊ هيلٿ سائنسز جي وائيس چانسلر پروفيسر ڊاڪٽر اڪرام الدين اُڄن، سيڪريٽري پبلڪ هيلٿ انجنيئرنگ سهيل احمد قريشي ۽ ٻين عملدارن جي موجودگيءَ ۾ ميڊيا کي بريفنگ ڏيندي وزيراعليٰ جي خصوصي معاون چيو ته “اربن واٽر سپلاءِ لاءِ سلو سينڊ فلٽريشن سسٽم جي بهتري، توسيع ۽ تعمير” جي عنوان سان هيءَ اسڪيم ايندڙ 15 سالن لاءِ يونيورسٽيءَ جي پاڻيءَ جي ضرورتن کي پورو ڪندي. هن چيو ته هي منصوبو 77 هزار کان وڌيڪ آباديءَ لاءِ ڊيزائين ڪيو ويو آهي، جنهن ۾ روزانو پاڻيءَ جي فراهمي جي گنجائش 2.546 ملين گيلن آهي، جيڪا في ماڻهو روزانو 30 گيلن استعمال جي بنياد تي آهي. هي نظام يونيورسٽيءَ جي تعليمي بلاڪن، هاسٽلن ۽ رهائشي علائقن ۾ فلٽر ٿيل پاڻيءَ جي بنا رنڊڪ دستيابيءَ کي يقيني بڻائيندو. هي منصوبو سنڌ يونيورسٽيءَ ۾ پڙهندڙ 43000 شاگردن جي پاڻيءَ جي ضرورتن کي پورو ڪندو. منصوبي جا تفصيل ٻڌائيندي محمد سليم بلوچ چيو ته ان ۾ پمپ هائوسز جي تعمير، اعليٰ صلاحيت واري پمپنگ مشينري جي تنصيب ۽ وسيع پائيپ لائين نيٽ ورڪ وڇائڻ شامل آهي. ڪي بي فيڊر کان اسٽوريج ٽئنڪن تائين هڪ هزار رننگ فوٽ جي 24 انچ ويڪري رائزنگ مين وڇائي ويندي، جڏهن ته 14 هزار رننگ فوٽ جي ڊيليوري مين سورس کي مرڪزي يونيورسٽي واٽر ورڪس سان ڳنڍيندي. هن چيو ته پاڻيءَ جي مؤثر فراهميءَ کي يقيني بڻائڻ لاءِ مختلف هنڌن تي 75 بي ايڇ پي (ٽي سيٽ)، 130 بي ايڇ پي (ٽي سيٽ) ۽ 100 بي ايڇ پي (ڇهه سيٽ) تي مشتمل پمپنگ مشينري لڳائي ويندي. هن چيو ته 8 فوٽ اونهائي وارا 320310 x فوٽ جا ٻه وڏا اسٽوريج ٽئنڪ ۽ 10 فوٽ اونهائي وارا 200105 x فوٽ جا ٻه ڪليئر واٽر ٽينڪ پڻ تعمير ڪيا ويندا. هن چيو ته منصوبي ۾ وڌيڪ پنج آر سي سي فلٽر بيڊز (15085 x فوٽ، وڌ ۾ وڌ ڇهه فوٽ اونهائي) جي تعمير شامل آهي ته جيئن سلو سينڊ فلٽريشن فراهم ڪري سگهجي، ان سان گڏ هڪ جديد ڊسٽريبيوشن سسٽم به هوندو جيڪو مختلف ويڪر واري پائيپ لائينن ذريعي سوين رننگ فوٽن تائين پکڙيل هوندو. هن وڌيڪ چيو ته اضافي سهولتن ۾ اسٽاف ڪوارٽرز، سمپ ويلز، انٽرڪنيڪشنز ۽ 4 لک چورس فوٽن جا پيور بلاڪس شامل هوندا. هن چيو ته پاڻيءَ جي صفائي جا جزا جهڙوڪ ايلم چيمبر ۽ هائپو-ڪلورينيٽر به لڳايا ويندا ته جيئن محفوظ پيئڻ جي پاڻيءَ جا معيار يقيني بڻايا وڃن. هن چيو ته اسڪيم ۾ 700 رننگ فوٽن تي ريلوي ۽ روڊ ڪراسنگز، ٽي موجوده ڪليئر واٽر ٽينڪن ۽ سورس تي ٽي اسٽوريج ٽئنڪن جي مرمت، 4 هزار 180 رننگ فوٽن جي ڪمپائونڊ وال جي تعمير، 22 سولر اسٽريٽ لائٽس جي تنصيب ۽ سائن بورڊز جي تنصيب پڻ شامل آهي. وزيراعليٰ جي خصوصي معاون هن منصوبي کي يونيورسٽيءَ اندر بنيادي انفراسٽرڪچر کي بهتر بڻائڻ ۽ شاگردن ۽ عملي کي درپيش پراڻن پاڻيءَ جي مسئلن کي حل ڪرڻ ڏانهن هڪ وڏو قدم قرار ڏنو. هن چيو ته حڪومت صوبي جي تعليمي ادارن ۾ پائيدار ۽ معياري پاڻيءَ جي فراهمي جا نظام يقيني بڻائڻ لاءِ پرعزم آهي. هن وڌيڪ چيو ته هي منصوبو ٻن سالن جي مختصر عرصي ۾ مڪمل ٿي ويندو. هن جو چوڻ هو ته هي منصوبو سندس نگرانيءَ ۾ مڪمل ڪيو ويندو ۽ ڪئمپس ۾ پاڻيءَ جي معيار ۽ دستيابي کي نمايان طور تي بهتر بڻائيندو. ان موقعي تي ميڊيا سان ڳالهائيندي وائيس چانسلر پروفيسر ڊاڪٽر فتح محمد مري چيو ته سنڌ حڪومت جو جديد واٽر فلٽريشن ۽ سپلاءِ منصوبو شروع ڪرڻ جو فيصلو عوامي شعبي جي يونيورسٽين ۾ بنيادي سهولتن کي بهتر بڻائڻ لاءِ سندس مضبوط عزم جي عڪاسي ڪري ٿو. ڊاڪٽر مريءَ هن قدم کي هڪ تاريخي قدم قرار ڏنو ۽ چيو ته صاف پيئڻ جي پاڻيءَ تائين رسائي سنڌ يونيورسٽيءَ ۾ تعليمي ۽ رهائشي ماحول کي نمايان طور تي بهتر بڻائيندي. هن وزيراعليٰ سيد مراد علي شاهه ۽ محمد سليم بلوچ جي هن قدم کي ساراهيو ۽ چيو ته هي منصوبو شاگردن، فيڪلٽي ۽ عملي کي درپيش پراڻن پاڻيءَ جي مسئلن کي حل ڪندو. هن چيو ته سائنسي طور تي ڊيزائن ڪيل نظام ذريعي فلٽر ٿيل پاڻيءَ جي فراهمي ڪيمپس ۾ بهتر صحت جا معيار يقيني بڻائيندي. ڊاڪٽر مري اعتماد جو اظهار ڪندي چيو ته هي منصوبو يونيورسٽيءَ جي مستقبل جي توسيع ۾ اهم ڪردار ادا ڪندو ۽ ان جي آبادي جي وڌندڙ ضرورتن کي پائيدار انداز ۾ پورو ڪندو. ان کان اڳ معاون خصوصي سنڌ يونيورسٽيءَ جي وائيس، سيڪريٽري پبلڪ هيلٿ انجنيئرنگ ۽ ٻين عملدارن سان گڏ ڪي بي فيڊر تي سائيٽ ۽ پمپنگ اسٽيشن جو دورو ڪيو.