جامعہ سندھ جامشورو کی جانب سے گزشتہ روز پاکستان کے 79ویں یومِ آزادی کی تقریبات کے سلسلے میں شجرکاری مہم کا منعقد  کا انعقاد کیا گیا، جس کے دوران وائس چانسلر پروفیسر ڈاکٹر فتح محمد مری (تمغۂ امتیاز) نے اعلان کیا کہ یومِ آزادی کے عشرے کی تقریبات 14 اگست تک جاری رہیں گی۔ سندھ یونیورسٹی رہائشی کالونی میں آغا تاج محمد پارک میں شجرکاری مہم کے افتتاح کے بعد خطاب کرتے ہوئے وائس چانسلر نے کہا کہ درخت لگانا صرف علامتی سرگرمی نہیں بلکہ ماحولیاتی تحفظ اور پائیدار ترقی کے لیے عملی عزم کا اظہار ہے۔ انہوں نے کہا کہ یومِ آزادی کے عشرے کی تقریبات شہریوں کو مثبت اقدامات کے ذریعے ملک کی ترقی میں اپنا کردار ادا کرنے کا پیغام دیتی ہیں، جبکہ سرسبز پاکستان ہی صحت مند اور خوشحال مستقبل کی ضمانت ہے۔ ڈاکٹر مری نے کہا کہ آج عوامی پارک میں لگائے گئے پودے آنے والے برسوں میں بڑے درخت بن کر ماحول کو مزید سرسبز، صحت مند اور خوشگوار بنائیں گے۔ انہوں نے زور دیا کہ ہر وہ شخص جس نے آج پودا لگایا ہے، اس کی اخلاقی ذمہ داری ہے کہ اس کی دیکھ بھال کرے، جب تک وہ مکمل درخت نہ بن جائے۔ انہوں نے کہا کہ آزادی کا حقیقی جذبہ قوم کی خلوص کے ساتھ خدمت کرنے اور اس کے قدرتی وسائل کی حفاظت کرنے میں ہے۔ وائس چانسلر نے طلباء، اساتذہ، ملازمین اور شہریوں پر زور دیا کہ وہ شجرکاری مہمات میں بھرپور حصہ لیں، کیونکہ آج لگایا گیا ہر درخت آنے والی نسلوں کے بہتر مستقبل میں سرمایہ کاری ہے۔ انہوں نے کہا کہ موسمیاتی تبدیلی پاکستان کے لیے سنگین چیلنج بن چکی ہے، جس کا مقابلہ کرنے کے لیے مشترکہ کوششوں سے سبز رقبہ بڑھانا اور حیاتیاتی تنوع کے تحفظ کو یقینی بنانا ضروری ہے۔ انہوں نے مزید کہا کہ یونیورسٹیوں کو ماحولیاتی شعور اجاگر کرنے اور نوجوانوں میں پائیدار طرزِ زندگی کو فروغ دینے میں قائدانہ کردار ادا کرنا چاہیے۔ ڈاکٹر مری نے یونیورسٹی کے اسٹیک ہولڈرز سے اپیل کی کہ وہ یومِ آزادی کے عشرے کی تقریبات کے دوران کم از کم ایک پودا ضرور لگائیں، کیونکہ ایسی مہمات ماحولیاتی ذمہ داری کے ساتھ قومی جذبے کو بھی فروغ دیتی ہیں۔ رجسٹرار جامعہ سندھ ساجد قیوم میمن نے کہا کہ شجرکاری یونیورسٹی کے ماحولیاتی تحفظ اور سماجی ذمہ داری سے وابستگی کا عملی ثبوت ہے۔ انہوں نے کہا کہ انتظامیہ کیمپس اور رہائشی کالونی کو مزید سرسبز بنانے کے لیے ایسی مہمات کی مکمل حمایت جاری رکھے گی۔ انہوں نے اساتذہ، ملازمین اور طلباء پر زور دیا کہ وہ نہ صرف شجرکاری مہم میں حصہ لیں بلکہ نئے لگائے گئے پودوں کی مناسب دیکھ بھال بھی کریں۔ سندھ یونیورسٹی رہائشی کالونی کے چیئرمین ڈاکٹر مظہر علی عباسی نے کہا کہ شجرکاری مہم رہائشی کالونی کی خوبصورتی میں اضافہ کرے گی اور صاف ستھرے ماحول کے قیام میں اہم کردار ادا کرے گی۔ انہوں نے یونیورسٹی کے ملازمین اور رہائشیوں کی بھرپور شرکت کو سراہتے ہوئے اسے مشترکہ سماجی ذمہ داری کی بہترین مثال قرار دیا۔ انہوں نے امید ظاہر کی کہ مشترکہ کوششوں سے رہائشی کالونی مزید سرسبز اور ماحول دوست بن جائے گی۔ تقریب میں مختلف فیکلٹیوں کے ڈینز، ڈائریکٹرز، چیئرپرسنز، ڈائریکٹر بیورو آف کریکولم حکومتِ سندھ، افسران، اساتذہ، ملازمین اور سندھ یونیورسٹی رہائشی کالونی کے رہائشیوں نے بھی شرکت کی اور یومِ آزادی کے سلسلے میں پودے لگانے کی مہم میں بھرپور حصہ لیا۔