سنڌ اسيمبليءَ جي ميمبر محمد قاسم سراج سومرو اڄ سنڌ يونيورسٽي پهچي وائيس چانسلر پروفيسر ڊاڪٽر فتح محمد مري(تمغه امتياز) سان ملاقات ڪئي. ملاقات دوران تعليم ۽ تحقيق سان لاڳاپيل گڏيل دلچسپيءَ وارن معاملن تي ڳالهه ٻولهه ڪئي ويئي. وائيس چانسلر معزز مهمان کي سنڌ يونيورسٽي اچڻ تي ڀليڪار چيو ۽ يونيورسٽيءَ جي بهتريءَ لاءِ ڪيل ڪوششن، ٿيل اڳڀرائين، حاصل ٿيل بهتر نتيجن ۽ مستقبل جي رٿابندين بابت آگاهي ڏني، جنهن کي هن ساراهيندي وائيس چانسلر جي ڪوششن جي واکاڻ ڪئي ۽ مختلف منصوبن ۾ پنهنجي مڪمل سهڪار جو يقين ڏياريو. ان موقعي تي محمد قاسم سراج سومرو وائيس چانسلر سان گڏ شهيد محترمه بينظير ڀٽو ڪنوينشن سينٽر جو دورو ڪيو ۽ اتي قائم ٿيل شهيد محترمه بينظير ڀٽو چيئر سميت مختلف چيئرز ڏٺيون ۽ انهن جي سرگرم ڪردار جي تعريف ڪئي. هن سينٽر ۾ قائم بينظير ڀٽو گئلري ۾ آويزان ٿيل شهيد محترمه بينظير ڀٽو جي يادگار تصويرن کي پڻ وڏي دلچسپيءَ سان ڏٺو ۽ محترمه جي شخصيت ۽ جدوجهد کي خراج تحسين پيش ڪيو. هن وزيٽرس بڪ تي پنهنجا تاثرات پڻ لکيا. ان موقعي تي شهيد محترمه بينظير ڀٽو چيئر جي ڊائريڪٽر ڊاڪٽر ريحانه ملاح ۽ ٻيا پڻ موجود هئا.