سنڌ يونيورسٽي ڄامشورو ۾ تعيلمي سال 2023ع لاءِ بيچلر ڊگري پروگرامن ۾ اسپورٽس ڪوٽا تي داخلائن لاءِ مختلف راندين جا ٽرائيلز 7 ۽ 8 فيبروري 2023ع تي منعقد ڪرائڻ جو اعلان ڪيو ويو آهي. سنڌ يونيورسٽيءَ جي ڊائريڪٽر اسپورٽس (بوائز) اجويد احمد ڀٽيءَ پنهنجي هڪ پڌرائيءَ ۾ ڄاڻايو آهي ته هاڪي، بيڊ منٽن، ٽيبل ٽينس، ڪراٽي، ٽائيڪوانڊو، باڪسنگ، نيٽ بال/ ٿرو بال ۽ ايٿليٽڪس جي اميدوارن کان ٽرائيلز 7 فيبروري تي صبح جو ڏهين وڳي سنڌ يونيورسٽيءَ جي حيدر بخش جتوئي پويلين ۾ ورتا ويندا. پڌرائيءَ موجب باسڪيٽ بال، والي بال ۽ چيس جا ٽرائيلز به 7 فيبروريءَ تي صبح جو ڏهين وڳي فاطمه جناح گرلز جمنازيم ۾ منعقد ٿيندا. پڌرائيءَ موجب فوٽ بال ۽ ڪرڪيٽ جا ٽرائيلز 8 فيبروريءَ تي صبح جو ڏهين وڳي حيدر بخش جتوئي پويلين ۽ سنڌ يونيورسٽيءَ جي پاڪستان ڪرڪيٽ بورڊ گرائونڊ ۾ منعقد ٿيندا. پڌرائيءَ موجب اميدوارن جي عمر 22 سال کان وڌيڪ نه هئڻ گهرجي ۽ هو ذهني ۽ جسماني طور مڪمل فٽ هجن. اميدوار پاڻ سان گڏ قومي سڃاڻپ ڪارڊ کڻي اچن ۽ کين اسپورٽس يونيفارم ۽ جوگرز پهريل هجن.