سنڌ يونيورسٽي ڄامشورو جي اينٿروپالاجي ۽ آرڪيالاجي ڊپارٽمينٽ طرفان ٻن ڏينهن تي مشتمل اسپورٽس فيسٽ 2025 پي سي بي گرائونڊ تي گذريل ڏينهن پڄاڻيءَ تي پهچي ويو. پڄاڻيءَ ۽ انعام ورهائڻ واري تقريب راندين جي مقابلن جي آخري ڏينهن منعقد ٿي، جنهن ۾ وائيس چانسيلر پروفيسر ڊاڪٽر فتح محمد مري خاص مهمان طور شرڪت ڪئي، جڏهن ته پرو وائس چانسلر (ٺٽو ڪيمپس) پروفيسر ڊاڪٽر مصباح بيبي قريشي ۽ ڊين فئڪلٽي آف نيچرل سائنسز پروفيسر ڊاڪٽر ناهيد ڪاڪا پڻ موجود هيون. ڊپارٽمينٽ آف اينٿروپالاجي ۽ آرڪيالاجي جي چيئرمين ڊاڪٽر عبدالرزاق چنا مهمانن کي ڀليڪار چيو ۽ ڊپارٽمينٽ جي تعليمي بهتري ۽ سماجي لاڳاپن بابت وڌندڙ ڪردار تي روشني وڌي۔ هن چيو ته راندين ۽ علمي سرگرمين گڏجي شاگردن جي شخصيت کي مڪمل بڻائن ٿيون ۽ انهن ۾ گڏيل تعاون ۽ همدردي جو جذبو پيدا ڪن ٿيون. ان موقعي تي ڳالهائيندي وائيس چانسيلر ڊاڪٽر فتح محمد مري ڊاڪٽر چنا جي اڳواڻي ۽ فئڪلٽي جي وابستگي جي ساراهه ڪندي چيو ته آرڪيالاجي ڊپارٽمينٽ يونيورسٽي جي سڀ کان بهترين شعبن مان هڪ آهي. هن چيو ته رانديون ذهني صحت، نظم ضبط ۽ گڏيل ڪم کي هٿي ڏين ٿيون ۽ صحتمند ذهن هميشه صحتمند جسم ۾ هوندو آهي. ڊاڪٽر مري شاگردن کي اپيل ڪئي ته هو يونيورسٽي جي خدمتن جهڙوڪ 1122 ايمرجنسي ريسپانس ۽ 1124 ٽيلي ميڊيسن مان ڀرپور فائدو وٺن. هن سنڌ جي ثقافتي ۽ تاريخي ورثي جي حفاظت تي به زور ڏيندي چيو ته اينٿروپالاجسٽ ۽ آرڪيالاجسٽ دراصل “انڊس تهذيب جا حقيقي محافظ” آهن. ان کان اڳ مختلف راندن جا مقابلا ٿيا، جن ۾ رحمان ڪلهوڙو جي ٽيم (فرسٽ ايئر) ڪرڪيٽ ٽورنامينٽ ۾ فتح حاصل ڪئي، جڏهن ته ارشاد  جمالي جي ٽيم (سيڪنڊ ايئر) رنر اپ رهي۔ شيره ۽ طاهر مردن جي بيڊمنٽن جا فاتح، جڏهن ته سويره ۽ سائره عورتن جي بيڊمنٽن جون فاتح بڻيون۔ سڀني شطرنج ۽ لڊو جي رانديگرن کي به سندن شاندار شرڪت تي تمغا ڏنا ويا. تقريب جي پڄاڻي تي ڪيڪ ڪٽنگ ۽ ريفريشمينٽ جو انتظام پڻ ڪيو ويو، وائيس چانسيلر ڪيڪ ڪاٽيو، جنهن بعد ٻن ڏينهن وارو ايونٽ پڄاڻيءَ تي پهچي ويو.