جامعہ سندھ جامشورو کی جانب سے سال 2026ء کے لیے بوائز ہاسٹلز کی دوبارہ الاٹمنٹ کا عمل باقاعدہ طور پر شروع کیا گیا ہے۔ سندھ یونیورسٹی کے پرووسٹ بوائز ہاسٹلز ڈاکٹر پسند علی کھوسو کے جاری کردہ سرکیولر کے مطابق الاٹمنٹ کا عمل 19 نومبر 2025ء سے شروع ہو گیا ہے۔ ہاسٹلز میں مقیم طلباء کو ہدایت کی گئی ہے کہ وہ اپنے الاٹمنٹ فارم بوائز ہاسٹلز کے اکیڈمک سیکشن سے دفتری اوقات کے دوران یکم دسمبر 2025ء سے قبل حاصل کرکے جمع کروا سکتے ہیں۔ سرکیولر میں اُن ضروری دستاویزات کی فہرست بھی جاری کی گئی ہے، جو طلباء کو اپنی درخواستوں کے ساتھ منسلک کرنا لازمی ہیں۔ ان میں داخلہ چالان کی کاپیاں، قومی شناختی کارڈ، یونیورسٹی کا شناختی کارڈ، ہاسٹل کارڈ، گزشتہ ہاسٹل چالان، پاسپورٹ سائز تصاویر، ہاسٹل فارم اور فیس چالان شامل ہیں۔ طلبہ کو یہ بھی ہدایت کی گئی ہے کہ وہ ہاسٹل اکوموڈیشن فارم اور فارم پروسیسنگ فیس چالان اپنے ای پورٹل سے حاصل کریں۔ پرووسٹ ڈاکٹر کھوسو نے واضح کیا ہے کہ فارم پروسیسنگ فیس تمام بینکوں میں موجود ’ون بل‘ سہولت کے ذریعے جمع کرائی جائے۔ انہوں نے سختی سے تنبیہ کی کہ طلباء ایزی پیسہ، یو بی ایل اومنی، جاز کیش یا ٹی سی ایس کے ذریعے فیس کی ادائیگی ہرگز نہ کریں۔ ہاسٹل کی ری الاٹمنٹ پروسیسنگ فیس کی ادائیگی کے لیے صرف بینکوں کے ’ون بل آئی ڈی‘ سسٹم کو ہی قبول کیا جائے گا۔