سنڌ يونيورسٽي ڄامشورو جي ڊاڪٽر اين.اي بلوچ چيئر جي اهتمام هيٺ نامياري عالم، محقق ۽ دانشور ڊاڪٽر نبي بخش خان بلوچ جي علمي ورثي ۽ تحقيقي خدمتن تي پھرين هڪ ڏينھن واري ڪانفرنس آرٽس فئڪلٽي جي شيخ اياز آڊيٽوريم ۾گذريل  ڏينهن منعقد ڪئي ويئي، جنهن جو مقصد ڊاڪٽر بلوچ جي سنڌي ٻولي، ادب، تاريخ ۽ تحقيق لاءِ ڪيل سڄي زندگيءَ جي خدمتن کي اجاگر ڪرڻ هو. هڪ ڏينهن واري ڪانفرنس ۾ صوبي جي ڪنڊ ڪڙڇ مان نامور اديبن، محققن ۽ علمي شخصيتن جي وڏي انگ شرڪت ڪئي. تقريب ۾ ڊاڪٽر بلوچ جي علمي ويزن، تحقيقي ڪم ۽ سنڌي مطالعي تي سندس دائمي اثرن جو تنقيدي جائزو ورتو ويو، جڏهن ته نوجوان نسل کي مقامي علم، تحقيقي ايمانداري ۽ علمي وقار سان وابسته تحقيق ڏانهن راغب ڪرڻ تي به زور ڏنو ويو. تقريب جي شروعات تلاوت ڪلام پاڪ سان ڪئي ويئي، جنھن جي سعادت اشفاق حسين چانڊيو حاصل ڪئي، جڏھن تھ نامور راڳي ڊاڪٽر ذوالفقار علي شاھھ لطيف جي وائي پيش ڪري ويٺلن کي موھي وڌو. تقريب کي خطاب ڪندي سنڌ يونيورسٽيءَ جي وائيس چانسلر پروفيسر ڊاڪٽر فتح محمد مريءَ ڊاڪٽر نبي بخش خان بلوچ کي سنڌي تحقيقي روايتن جو بنياد وجهندڙ هڪ عظيم فڪري شخصيت قرار ڏنو ۽ چيو ته ڊاڪٽر بلوچ پنهنجي سڄي حياتي سنڌ جي لساني ۽ ثقافتي ورثي جي تحفظ لاءِ وقف ڪري ڇڏي. سندس تحقيقي طريقيڪار اڄ به جديد دور جي محققن لاءِ رهنمائي جو ذريعو بڻيل آهي. وائيس چانسلر زور ڏنو ته يونيورسٽين تي ذميواري آهي ته اهڙن وڏن عالمن جي علمي ورثي کي محفوظ ڪرڻ سان گڏ انکي هٿي وٺرائين، جڏهن ته سنڌ يونيورسٽي ان حوالي سان پنهنجو فرض نڀائي رهي آهي. هن چيو ته ڊاڪٽر بلوچ جي ڪم سنڌي علمي تحقيق کي عالمي علمي گفتگو سان جوڙي ڇڏيو آھي. ڊاڪٽر مري چيو ته اهڙن عالمن کي ڀيٽا پيش ڪرڻ سان تحقيق تي ٻڌل علمي ماحول کي هٿي ملي ٿي. هن وڌيڪ چيو ته ڊاڪٽر بلوچ جون تحريرون اڄ به مستند حوالن طور استعمال ٿين ٿيون. سنڌ يونيورسٽي ڊاڪٽر بلوچ جهڙن عالمن تي فخر ڪري ٿي، جن صوبي جي ادارن جي تعليمي ساک کي مضبوط ڪيو. وائيس چانسلر چيو ته ڊاڪٽر بلوچ جو تعليمي ۽ تحقيقي ويزن نسلن ۽ مضمونن جي حدن کان مٿانهون هو، اڄوڪي ڪانفرنس سندس فڪري مشن کي اڳتي وڌائڻ جي هڪ اهم ڪوشش آهي. سنڌي ٻوليءَ جي ماهر ۽ 40 کان وڌيڪ ڪتابن جي ليکڪ پروفيسر ڊاڪٽر قاضي خادم چيو ته ڊاڪٽر بلوچ جي بين الشعباتي (ملٽي ڊسيپلينري) سوچ ٻولي، تاريخ ۽ ثقافت جي مطالعي کي مالامال ڪيو. هن چيو ته ڊاڪٽر بلوچ جون تحريرون اڄ به جديد تحقيق ۾ لاڳاپيل آهن، جڏهن ته سندس تحقيقي ۽ تنقيدي سوچ اصل ۾ نواڻ جي حوصلا افزائي ڪري ٿي. هنن چيو ته ڊاڪٽر بلوچ جو فڪري ورثو اڄ به تعليمي عظمت کي همٿ ڏياري ٿو. ان موقعي تي ڊاڪٽر عبدالغفار سومري چيو ته ڊاڪٽر نبي بخش خان بلوچ صرف هڪ عالم نه پر پنهنجي زات ۾ هڪ ادارو هو. هن چيو ته ڊاڪٽر بلوچ سنڌي تحقيق ۾ سائنسي انداز متعارف ڪرايو، جڏهن ته سندس تنقيدي سوچ ادب ۽ تاريخ جي مطالعي کي نئون رخ ڏنو. هن چيو ته سچائي سان وابستگيءَ ۽ نيڪ نيتيءَ ڊاڪٽر بلوچ کي پنهنجن همعصرن کان ممتاز بڻايو. تنهن ڪري اڄ جي نوجوان محققن کي سندس منظم تحقيقي روايتن تي هلڻ گهرجي. تقريب کي خطاب ڪندي ڊاڪٽر رخمان گل پالاري چيو ته ڊاڪٽر بلوچ جون سنڌي ٻولي ۽ لوڪ ادب لاءِ بي مثال خدمتون آهن. هن چيو ته ڊاڪٽر بلوچ سنڌ جي ڪيترن وساريل فڪري پهلوئن کي ٻيهر زندهه ڪيو، سندس تحقيق سنڌي ادب جي افقن کي وسيع ڪيو. هن چيو ته ڊاڪٽر بلوچ بنيادي ذريعن تي ٻڌل تحقيق تي يقين رکندو هو ۽ سندس علمي ورثو ايندڙ نسلن لاءِ روشنيءَ جو مينار رهندو. محمد ارشد شيخ چيو ته ڊاڪٽر نبي بخش خان بلوچ عالمي سطح جو ويزنري عالم هو. هن چيو ته ڊاڪٽر بلوچ سنڌي ٻوليءَ کي عالمي تعليمي فورمن تي تعليمي حيثيت ڏياري. هن وڌيڪ چيو ته ڊاڪٽر بلوچ بي شمار محققن جي صبر ۽ دانائي سان رهنمائي ڪئي. سندس علمي ايمانداريءَ تحقيقي اخلاقيات لاءِ معيار قائم ڪيو. هن چيو ته ڊاڪٽر بلوچ کي ياد ڪرڻ سنجيده علمي وابستگيءَ جي تجديد آهي. تقريب دوران ڊاڪٽر اين.اي بلوچ چيئر پاران شايع ڪرايل ڪتاب “ٻولاين جا ٻول” جو باضابطه مهورت پڻ ڪيو ويو، جنهن جي صدارت پڻ وي سي پروفيسر ڊاڪٽر فتح محمد مري ڪئي. ان کان پوءِ مقالا پڙھڻ جو سيشن منعقد ٿيو، جنهن جي صدارت ڊاڪٽر عبدالغفار سومري ڪئي، جڏهن ته پروفيسر ڊاڪٽر قاضي خادم خاص مهمان طور شريڪ ٿيو. نامور عالمن ڊاڪٽر پروين موسيٰ ميمڻ، ڊاڪٽر اسد جمال پلي، ڊاڪٽر ريحانھ ملاح، تاج جويو، ڊاڪٽر رحمان گل پالاري ۽ ڊاڪٽر انور فگار هڪڙو پنهنجا تحقيقي مقالا پيش ڪيا، جن ۾ ڊاڪٽر بلوچ جي علمي خدمتن جي مختلف پهلوئن تي روشني وڌي ويئي. مقررن جو چوڻ هو ته ڊاڪٽر بلوچ جديد سنڌي تحقيق جا مضبوط بنياد رکيا. ڪانفرنس جي پڄاڻيءَ تي مھمانن ۾ شيلڊون ۽ ڪانفرنس جي انتظامن کي ھلائيندڙ رضاڪارن ۾ سرٽيفڪيٽ ورھايا ويا. ڊاڪٽر نبي بخش خان بلوچ چيئر جي ڊائريڪٽر ڊاڪٽر شازيه پتافيءَ مهمانن جا ٿورا مڃيا. تقريب ۾ فئڪلٽي آف آرٽس جي ڊين پروفيسر ڊاڪٽر محمد خان سانگي، سنڌي شعبي جي چيئرمين ڊاڪٽر نور محمد شاھھ، ڊاڪٽر نواب ڪاڪا، ڊاڪٽر مخمور بخاري، پروفيسر ڊاڪٽر حافظ منير احمد خان، انسٽيٽيوٽ آف سنڌالاجي جي ڊائريڪٽر ڊاڪٽر فياض لطيف، ڊپارٽمينٽ آف هسٽري جي چيئرمين پروفيسر ڊاڪٽر عرفان احمد شيخ، ڊاڪٽر محمد علي لغاري، ڊاڪٽر بشير جتوئي، ڊاڪٽر علي صديقي، ڊاڪٽر عبدالحميد پنهور سميت ڪيترين ئي علمي ۽ ادبي شخصيتن شرڪت ڪئي.