سنڌ يونيورسٽي ڄامشورو ۾ اڪيڊمڪ ڪانووڪيشن مارچ جي آخري هفتي ۾ منعقد ٿيندو، جنهن ۾ تعليمي سال 2024ع ۾ بيچلرز ۽ ماسٽرس جڏهن ته 2024ع ۽ 2025ع ۾ ايم فِل ۽ پي ايڇ ڊي مڪمل ڪندڙ شاگردن ۽ اسڪالرن کي ڊگريون ڏنيون وينديون. اڪيڊمڪ ڪانووڪيشن لاءِ آن لائين رجسٽريشن 19 جنوريءَ کان شروع ٿي ويئي، جيڪا 19 فيبروري 2026ع تائين جاري رهندي. ڪانووڪيشن جي سيڪريٽري ڊاڪٽر عرفانه بيگم ملاح ان سلسلي ۾ ٻڌايو ته سنڌ يونيورسٽيءَ جي آفيشل ويب سائيٽ تي آن لائين رجسٽريشن ڪرائي سگهجي ٿي. هن چيو ته تعليمي ڪانووڪيشن ۾ بيچلر ۽ ماسٽر جا اهي شاگرد پنهنجون ڊگريون وٺي سگهندا، جن 2024ع ۾ پاس آئوٽ ڪيو. هن چيو ته 2024ع ۽ 2025ع ۾ تعليم مڪمل ڪندڙ ايم فل ۽ پي ايڇ ڊي جا اسڪالر پڻ ڪانووڪيشن ۾ ڊگريون وٺي سگهندا.