سنڌ يونيورسٽي جي ٽرانسپورٽ ڪميٽي جو هڪ اهم اجلاس وائيس چانسلر پروفيسر ڊاڪٽر فتح محمد مري جي صدارت هيٺ سندس آفيس ۾ منعقد ٿيو، جنهن ۾ پئٽرول توڙي ڊيزل جي قيمتن ۾ تازي واڌ سبب اداري تي مالي دٻاءَ گھٽائڻ لاءِ قدمن تي غور ڪيو ويو. اجلاس ۾ انهن مختلف آپشنن جو جائزو ورتو ويو، جيڪي شاگردن کي ڪيمپس تائين ۽ واپس پهچائيندڙ پوائنٽ بسز لاءِ ڊيزل تي خرچ کي گھٽائڻ لاءِ موزون هجن. ميمبرن ٽرانسپورٽ جي آپريشن کي معقول بڻائڻ جا طريقا بحث هيٺ آندا ۽ چيو وي ته اهڙو طريقيڪار اختيار ڪيو ويندو، جنهن سان شاگردن جي تعليمي سرگرمين تي ڪو ناڪاري اثر نه پوي. اجلاس ۾ بحث مباحثي دوران تجويز پيش ڪئي وئي ته فزيڪل ڪلاس هفتي ۾ ٽئي ڏينهن يعني مهيني ۾ تقريباً 12 ڏينهن هلايا وڃن، جڏهن ته هفتي جي چوٿين ڏينهن آن لائن ڪلاسز منعقد ڪري سگهجن ٿا. اجلاس ۾ اهڙي تجويز ٻارڻ جي استعمال کي گھٽائڻ ۽ يونيورسٽي جي وسيلن کي وڌيڪ مؤثر انداز ۾ منظم ڪرڻ لاءِ ممڪن قدم طور پيش ڪئي وئي. ڪميٽي جي ميمبرن چيو ته ٽرانسپورٽ سروسز جي فراهمي جي خرچ ۾ تيل جي قيمتن ۾ واڌ سبب نمايان اضافو ٿيو آهي. اهو پڻ ٻڌايو ويو ته اڳ مهيني جي 20 ڏينهن دوران جيڪو خرچ ٻارڻ تي ايندو هو، اهو آڻي تقريباً 12 ڏينهن ۾ ٿي رهيو آهي. اجلاس ۾ ون پوائنٽ ايجنڊا تي تفصيل سان بحث ڪرڻ بعد ڪميٽيءَ ٽرانسپورٽ جي وڌندڙ خرچ کي ڪنٽرول ڪرڻ لاءِ ڄاڻايل عارضي تجويز تيار ڪئي. وائيس چانسلر چيو ته ڄاڻايل تجويز 7 اپريل تي رٿيل وائيس چانسلرن جي اجلاس ۾ پيش ڪئي ويندي، جنهن بعد جيڪو به گڏيل فيصلو ٿيو، ان تحت سنڌ يونيورسٽي پڻ اڳتي وڌندي.