سنڌ يونيورسٽي ڄامشورو جي جاگرافي شعبي پاران گرين يوٿ موومينٽ ڪلب جي سهڪار سان گذريل ڏينهن ڌرتي ماءُ جو عالمي ڏهاڙو ملهايو ويو، ان سلسلي ۾ آگاهي واڪ ۽ وڻڪاري مهم جو اهتمام ڪيو ويو ته جيئن شاگردن ۽ استادن ۾ ماحولياتي ذميواري جو شعور پيدا ڪري سگهجي. وائيس چانسلر پروفيسر ڊاڪٽر فتح محمد مري جي اڳواڻي ۾ آگاهي واڪ سينٽرل لائبريري کان شروع ٿي جاگرافي شعبي وٽ پهتي جتي تقريرون پڻ ڪيون ويون. بعد ۾ جاگرافي شعبي اندر وڻڪاري مهم جو افتتاح پروفيسر ڊاڪٽر فتح محمد مري ٻوٽو پوکي ڪيو. سندس چوڻ هو ته موسمياتي تبديلي تيزيءَ سان وڌندڙ هڪ عالمي چئلينج آهي، جنهن کي منهن ڏيڻ لاءِ گڏيل ڪوششن جي ضرورت آهي. هن چيو ته وڌندڙ گرمي پد ماحولياتي بگاڙ کي تيزيءَ سان وڌائي رهيو آهي. هن وڌيڪ چيو ته ماحولياتي توازن بحال ڪرڻ لاءِ ٻوٽن جي پوکائي هڪ مؤثر قدم آهي، تنهن ڪري ڪئپس تي وڌ کان وڌ ٻوٽا پوکيا ويندا. هن پلاسٽڪ جي استعمال ۾ گهٽتائي آڻڻ تي زور ڏيندي چيو ته پلاسٽڪ جا اثر نهايت نقصانڪار آهن. ڊاڪٽر مري ماحولياتي تبديلي کي سمجهڻ ۽ پائيدار حل ڳولڻ ۾ جاگرافي جي اهم ڪردار کي پڻ اجاگر ڪيو. هن مادرعلمي ۾ ماحول دوست روين جي واڌاري جي اهميت تي زور ڀريو. جاگرافي شعبي جي چيئرمين ڊاڪٽر سجومل ميگهواڙ چيو ته موسمياتي تبديلي ۽ جاگرافي بابت عوامي آگاهي پيدا ڪرڻ انساني بقا لاءِ ضروري آهي، هن خبردار ڪيو ته وڌندڙ گرمي پد انسانيت لاءِ سنجيده خطرو بڻجي رهيو آهي. ان موقعي تي جاگرافي جي شاگردن امير علي، مهڪ، فراز، رمشا، دليپ، حشمت ۽ نازيه ماحولياتي تحفظ لاءِ وڌ کان وڌ ٻوٽا پوکڻ سميت ماڻهن ۾ سڄاڳي پيدا ڪرڻ بابت پنهنجي عزم جو اظهار ڪيو. هنن وڻڪاري مهم ۾ به حصو ورتو ۽ وڻ پوکڻ کي صاف ۽ صحتمند مستقبل ڏانهن اهم قدم قرار ڏنو. ان موقعي تي ڊين فئڪلٽي آف نيچرل سائنسز پروفيسر ڊاڪٽر ناهيد ڪاڪا، پروفيسر ڊاڪٽر شفيق احمد جوڻيجو، شائسته خان، محب علي لغاري، سعدالله راهوجو، علي انور چانڊيو، نيلوفر سهارڻ، ڊاڪٽر خالد لاشاري، ڊاڪٽر رفيق لاشاري، ڊاڪٽر شاهه مراد چانڊيو، ڊاڪٽر عبدالرزاق چنا، محمد يونس لغاري، ڊاڪٽر ذوالفقار علي لغاري، ڊاڪٽر پنھل خان لاشاري، ڊاڪٽر نظير بروهي، ڊاڪٽر محمد علي لغاري، ڊاڪٽر رفيق قمبراڻي، پروفيسر منٺار علي، رفيق بروهي، منور راڄڙ ۽ ٻيا ڪيترائي استاد ۽ شاگرد پڻ موجود هئا.