جامعہ سندھ جامشورو کے بیورو آف اسٹیگس اور شعبہ انٹرنیشنل ریلیشنز کے مشترکہ تعاون سے نیلسن منڈیلا ہال میں منشیات کے خلاف آگاہی سیشن منعقد کیا گیا، جس کے لیے تعاون وزارت نارکوٹکس کنٹرول اور اینٹی نارکوٹکس فورس (اے این ایف) کی ریجنل ڈائریکٹوریٹ نے کیا۔ آگاہی سیشن کا مقصد طلبہ اور عام لوگوں میں منشیات کے جسمانی، سماجی اور نفسیاتی نقصانات کے بارے میں شعور پیدا کرنا تھا، جنہیں مقررین نے ملک خصوصاً تعلیمی اداروں کے لیے ایک سنگین چیلنج قرار دیا۔ سیشن سے خطاب کرتے ہوئے اینٹی نارکوٹکس فورس بحالی مرکز حیدرآباد کے انچارج ڈاکٹر شہریار قمبرانی نے کہا کہ منشیات کا بڑھتا ہوا استعمال نوجوان نسل کے لیے انتہائی خطرناک بن چکا ہے، جس کی روک تھام کے لیے مشترکہ کوششوں کی ضرورت ہے۔ انہوں نے کہا کہ اینٹی نارکوٹکس فورس اس سماجی اور نفسیاتی مسئلے کے خلاف سرگرمِ عمل ہے، لیکن تعلیمی اداروں کے تعاون کے بغیر مکمل کامیابی ممکن نہیں۔ اے این ایف حیدرآباد کے ایڈیشنل ایس ایچ او صدیق احمد نے طلباء پر زور دیا کہ وہ منشیات جیسی لعنت سے خود کو دور رکھیں اور صحت مند اور محفوظ معاشرے کی تعمیر میں اپنا کردار ادا کریں۔ سیشن کے اختتام پر چیئرپرسن شعبہ بین الاقوامی تعلقات پروفیسر ڈاکٹر عشرت افشاں عباسی اور ڈائریکٹر بیورو آف اسٹیگس اجوید بھٹی نے مہمان مقررین کا شکریہ ادا کیا۔