سنڌ يونيورسٽي ڄامشوري جي فيڪلٽي آف انجنيئرنگ اينڊ ٽيڪنالاجي جي ٽيڪنالاجي انڪيوبيشن سينٽر (TIC) پاران آخري سال جي شاگردن لاءِ “آن لائن ڪيريئر فارمولو: اسڪلز، برانڊنگ ۽ فري لانسنگ” جي عنوان سان سيمينار منعقد ڪيو ويو، جنهن جو مقصد شاگردن کي آن لائن ڪيريئر جي نون موقعن کان آگاهه ڪرڻ ۽ سندن مهارتن کي آمدني جو ذريعو بڻائڻ بابت رهنمائي فراهم ڪرڻ هو. هن سيمينار ۾ فئڪلٽي آف انجنيئرنگ اينڊ ٽيڪنالاجي جي ڊين پروفيسر ڊاڪٽر لڇمڻ داس ڌوميجا خاص مهمان طور شرڪت ڪئي. پنهنجي خطاب  ۾  ڊاڪٽر ڌوميجا شاگردن کي ڪلاس روم کان ٻاهر عملي تجربا فراهم ڪرڻ جي اهميت تي زور ڏيندي چيو ته کين روزگار حاصل ڪرڻ سان گڏ فري لانسنگ، ڪاروبار ۽ خود روزگار جا موقعا فراهم ڪرڻ لاءِ اثرائتا رستا هموار ڪرڻ گهرجن. هن شاگردن کي آن لائين ڪيريئر جي موقعن مان وڌ ۾ وڌ فائدو حاصل ڪرڻ جي پڻ صلاح ڏني.  ان موقعي تي ڊجيٽل مارڪيٽنگ ۽ سوشل ميڊيا جي شعبن ۾ وسيع تجربو رکندڙ فري لانس ٽرينر ۽ مينٽر پشمينه رحيم موضوع جي مناسبت سان ليڪچر ڏنو. سيمينار دوران مس پشمينه رحيم آن لائن ڪيريئر جي موقعن، مارڪيٽ ۾ گهربل مهارتن، ذاتي برانڊنگ، فري لانس معيشت، مهارتن کي آمدني ۾ تبديل ڪرڻ ۽ پائيدار آن لائن ڪيريئر شروع ڪرڻ لاءِ عملي منصوبا جوڙڻ بابت مفيد ڄاڻ فراهم ڪئي. هن اهو پڻ سمجهايو ته تعليمي ۽ ٽيڪنيڪل مهارتن کي موجوده ڊجيٽل مارڪيٽ جي گهرجن سان ڪيئن هم آهنگ ڪري سگهجي ٿو ۽ انهن کي پروفيشنل آن لائن سڃاڻپ ۾ ڪيئن تبديل ڪري سگهجي ٿو. ان موقعي تي ٽي آءِ سي جي فوڪل پرسن ڊاڪٽر شازيه عباسي مهمان اسپيڪر، ڊين، فيڪلٽي ميمبرن ۽ شاگردن کي ڀليڪار ڪيو ۽ سيمينار جي مقصدن تي روشني وجهندي چيو ته هن سيمينار جو مقصد مهارتن ۾ اضافو ڪرڻ، ڪاروباري صلاحيتن کي وڌائڻ ۽ ڊجيٽل روزگار جي قابليت ۽ ڪيريئر لاءِ تياري کي هٿي وٺرائڻ آهي. هن چيو ته TIC جي ڪوشش شاگردن کي نوڪريون ڳولڻ وارو بڻائڻ  بدران نوڪريون پيدا ڪندڙ ۽ ڊجيٽل معيشت مان  وڌ ۾ وڌ فائدو حاصل ڪرڻ لاءِ بااختيار بڻائڻ آهي. سيمينار جي آخر ۾  ڊپارٽمينٽ آف انفارميشن ٽيڪنالاجي جي چيئرمين ڊاڪٽر ذيشان ڀٽي مهمانن ۽ شرڪت ڪندڙن جا ٿورا مڃيا.