جامعہ سندھ جامشورو اور آرمی پبلک اسکول اینڈ کالج حیدرآباد کینٹ کے مابین تعلیمی معاہدہ طے پایا ہے، جس کے تحت جامعہ سندھ میں بی ایڈ و ایم ایڈ کے طلباءآرمی پبلک اسکول اینڈ کالج میں انٹرنشپ کر سکیں گے، تاہم آرمی پبلک اسکول اینڈ کالج کے ٹیچرز جامعہ سندھ میں بہترین اساتذہ کی زیر نگرانی تربیت حاصل کر سکیں گے۔ مفاہمتی یادداشت پر جامعہ سندھ کی جانب سے شیخ الجامعہ سندھ پروفیسر ڈاکٹر محمد صدیق کلہوڑو کی جانب سے نامزد کیے گئے ڈین فیکلٹی آف ایجوکیشن پروفیسر ڈاکٹر عبدالستار عالمانی نے دستخط کیے، جبکہ آرمی پبلک اسکول اینڈ کالج کی جانب سے پرنسپال پروفیسر شہزاد محمود سردار نے دستخط کیے۔ اس موقع پر ڈائریکٹر اوریک جامعہ سندھ محمد عقیل بھٹو بھی موجود تھے۔ تقریب ڈین فیکلٹی آف ایجوکیشن ڈاکٹر عبدالستار عالمانی کے آفس میں منعقد ہوئی۔ اس موقع پر بات چیت کرتے ہوئے ڈاکٹر عبدالستار عالمانی نے کہا کہ آرمی پبلک اسکول اینڈ کالج اور جامعہ سندھ کے مابین معاہدہ ہونے سے دونوں اداروں کے اساتذہ و طلباءکو فائدہ ہوگا، جس سے سیکھنے کے نئے طریقے اور مہارتیں حاصل کرنے میں مدد ملے گی۔ بعد ازاں پرنسپال آرمی پبلک اسکول اینڈ کالج کو وفد سمیت فیکلٹی آف ایجوکیشن کا دورہ کرایا گیا۔